ಸುಳ್ಯ: ಕೆಲಸ ಮುಗಿಸಿ ಮನೆಗೆ ಮರಳಿದ್ದ ಮಹಿಳೆಯೊಬ್ಬರು ಮನೆಯಂಗಳದಲ್ಲೇ ಸಂಭವಿಸಿದ ದುರಂತದಲ್ಲಿ ಪ್ರಾಣ ಕಳೆದುಕೊಂಡ ಹೃದಯವಿದ್ರಾವಕ ಘಟನೆ ಸುಳ್ಯ ತಾಲೂಕಿನ ದುಗಲಡ್ಕದ ಕೊಳಂಜಿಕೋಡಿಯಲ್ಲಿ ನ.11ರಂದು ಮಧ್ಯಾಹ್ನ ನಡೆದಿದೆ.
ದುಗಲಡ್ಕದ ಕೊಳಂಜಿಕೋಡಿಯ ದಿ. ಉಮ್ಮರ್ ಅಬ್ದುಲ್ ಅವರ ಪತ್ನಿ ಕಮಾರುನ್ನಿಸ (ಹೆಸರು) ಮೃತಪಟ್ಟ ಮಹಿಳೆ.
ಕಮಾರುನ್ನಿಸ ಅವರು ಕೆ.ಎಫ್.ಡಿ.ಸಿ.ಯಲ್ಲಿ ಟ್ಯಾಪರ್ ಆಗಿ ಕೆಲಸ ನಿರ್ವಹಿಸುತ್ತಿದ್ದರು. ಕೆಲಸದ ಬಳಿಕ ಅವರನ್ನು ಮನೆಗೆ ಕರೆತಂದು ಕಾರಿನಿಂದ ಇಳಿಸಲಾಗಿತ್ತು. ಬಳಿಕ ಸಂಬಂಧಿಯೊಬ್ಬರು ಮನೆಯಂಗಳದಲ್ಲಿ ನಿಲ್ಲಿಸಿದ್ದ ಕಾರನ್ನು ಹಿಂದಕ್ಕೆ ತೆಗೆಯುತ್ತಿದ್ದ ಸಂದರ್ಭದಲ್ಲಿ ಹಿಂದೆ ನಿಂತಿದ್ದ ಕಮಾರುನ್ನಿಸ ಅವರನ್ನು ಗಮನಿಸದೆ ಕಾರು ಡಿಕ್ಕಿ ಹೊಡೆದಿದೆ ಎನ್ನಲಾಗಿದೆ.
ಡಿಕ್ಕಿಯ ರಭಸಕ್ಕೆ ಅವರು ಕಾರಿನಡಿಗೆ ಸಿಲುಕಿ ತೀವ್ರವಾಗಿ ಗಾಯಗೊಂಡಿದ್ದು, ದುರಂತದಲ್ಲಿ ಕೊನೆಯುಸಿರೆಳೆದಿದ್ದಾರೆ ಎಂದು ತಿಳಿದುಬಂದಿದೆ.
ಕೆಲಸ ಮುಗಿಸಿ ಮನೆಗೆ ಬಂದಿದ್ದ ಅವರು ಮನೆಯವರೊಂದಿಗೆ ಒಂದಷ್ಟು ಸಮಯ ಕಳೆಯುವ ಮೊದಲೇ ವಿಧಿಯ ಕ್ರೂರ ಆಟಕ್ಕೆ ಬಲಿಯಾಗಿರುವುದು ಕುಟುಂಬಸ್ಥರು ಹಾಗೂ ಸ್ಥಳೀಯರಲ್ಲಿ ತೀವ್ರ ಶೋಕ ಮೂಡಿಸಿದೆ. ಮನೆಯಂಗಳದಲ್ಲೇ ಸಂಭವಿಸಿದ ಈ ಆಕಸ್ಮಿಕ ದುರಂತ ಇಡೀ ಪರಿಸರವನ್ನು ದುಃಖದ ಮಡುವಿನಲ್ಲಿ ಮುಳುಗಿಸಿದೆ.
