ಸುಳ್ಯ, ಅ.25: ಮದುವೆ ನಿಶ್ಚಿತಾರ್ಥದ ಸಂಭ್ರಮ ಮುಗಿಸಿ ಬೆಂಗಳೂರಿನತ್ತ ಸಂತೋಷದಿಂದ ಪ್ರಯಾಣ ಬೆಳೆಸಿದ್ದ ಕುಟುಂಬವೊಂದಕ್ಕೆ ವಿಧಿ ಕ್ರೂರವಾಗಿ ಎರಗಿದೆ. ರಾಷ್ಟ್ರೀಯ ಹೆದ್ದಾರಿ 275ರ ಗೂನಡ್ಕ ಶಾರದಾ ಶಾಲೆಯ ಸಮೀಪ ಅ.25ರಂದು ಕಾರು ಮತ್ತು ಲಾರಿ ನಡುವೆ ಸಂಭವಿಸಿದ ಭೀಕರ ಅಪಘಾತದಲ್ಲಿ 10 ವರ್ಷದ ಬಾಲಕ ತನುಷ್ ಮೃತಪಟ್ಟಿದ್ದು, ಕುಟುಂಬದ ಇಬ್ಬರು ಸದಸ್ಯರು ಗಂಭೀರವಾಗಿ ಗಾಯಗೊಂಡಿದ್ದಾರೆ. ಕುಟುಂಬದ ಸಂತೋಷದ ಕ್ಷಣಗಳು ಕ್ಷಣಾರ್ಧದಲ್ಲಿ ದುಃಖದ ಮಡುವಿಗೆ ತಳ್ಳಲ್ಪಟ್ಟಿವೆ
ಬಂಟ್ವಾಳ ತಾಲೂಕಿನ ಪುಣಚದಲ್ಲಿ ಮೂಲದ ಕುಟುಂಬವು ನಿಶ್ಚಿತಾರ್ಥದ ಕಾರ್ಯಕ್ರಮ ಮುಗಿಸಿ ಬೆಂಗಳೂರಿಗೆ ಹಿಂದಿರುಗುತ್ತಿತ್ತು. ಈ ಸಂದರ್ಭದಲ್ಲಿ ಗೂನಡ್ಕದ ಬಳಿ ಕಾರು ಮತ್ತು ಲಾರಿ ನಡುವೆ ಭೀಕರ ಡಿಕ್ಕಿ ಸಂಭವಿಸಿದೆ. ಡಿಕ್ಕಿಯ ತೀವ್ರತೆಗೆ ಕಾರಿನಲ್ಲಿದ್ದ ಬಾಲಕ ತನುಷ್ ಸ್ಥಳದಲ್ಲೇ ಮೃತಪಟ್ಟಿದ್ದಾನೆ ಎಂದು ತಿಳಿದುಬಂದಿದೆ.
ಅಪಘಾತದಲ್ಲಿ ಬಾಲಕನ ತಂದೆ ನಾರಾಯಣ (45), ತಾಯಿ ವಿನುತಾಶ್ರೀ (40), ಐದು ವರ್ಷದ ತಂಗಿ ನಿಶ್ವಿತಾ ಹಾಗೂ 68 ವರ್ಷದ ಅಜ್ಜಿ ರತ್ನಾ ಗಾಯಗೊಂಡಿದ್ದಾರೆ. ಗಾಯಾಳುಗಳಲ್ಲಿ ಇಬ್ಬರ ಸ್ಥಿತಿ ಗಂಭೀರವಾಗಿದೆ ಎಂದು ತಿಳಿದುಬಂದಿದ್ದು, ಅವರನ್ನು ಆಂಬ್ಯುಲೆನ್ಸ್ ಮೂಲಕ ಆಸ್ಪತ್ರೆಗೆ ಕರೆದೊಯ್ಯಲಾಗಿದೆ.
ನಿಶ್ಚಿತಾರ್ಥದ ಸಂಭ್ರಮದ ಬೆನ್ನಲ್ಲೇ ದುರಂತ
ಬೆಂಗಳೂರಿನ ವಿಮಾನ ನಿಲ್ದಾಣದಲ್ಲಿ ಉದ್ಯೋಗದಲ್ಲಿರುವ ನಾರಾಯಣ ಅವರು ಕುಟುಂಬದೊಂದಿಗೆ ಪುಣಚಕ್ಕೆ ಬಂದು ನಿಶ್ಚಿತಾರ್ಥದ ಕಾರ್ಯಕ್ರಮದಲ್ಲಿ ಪಾಲ್ಗೊಂಡಿದ್ದರು. ಕುಟುಂಬದವರೊಂದಿಗೆ ಸಂತೋಷದ ಕ್ಷಣಗಳನ್ನು ಕಳೆದು, ಕಾರ್ಯಕ್ರಮ ಮುಗಿಸಿ ಬೆಂಗಳೂರಿಗೆ ಮರಳುತ್ತಿದ್ದಾಗ ಈ ದುರಂತ ಸಂಭವಿಸಿದೆ.
ಮನೆಯವರೊಂದಿಗೆ ನಗುತ್ತಾ, ಸಂಭ್ರಮದಿಂದ ಪ್ರಯಾಣಿಸುತ್ತಿದ್ದ ಪುಟ್ಟ ತನುಷ್‌ನ ಬದುಕು ಅರ್ಧದಲ್ಲೇ ಅಂತ್ಯಗೊಂಡಿದೆ. ಮಗನೊಂದಿಗೆ ಮನೆಗೆ ಮರಳಬೇಕಿದ್ದ ತಂದೆ-ತಾಯಿಗೆ ಎದುರಾದ ಈ ಆಘಾತ ಎಂಥವರ ಮನವನ್ನೂ ಕಲಕುವಂತಿದೆ. ಒಂದೆಡೆ ಮಗುವನ್ನು ಕಳೆದುಕೊಂಡ ನೋವು, ಮತ್ತೊಂದೆಡೆ ಗಾಯಗೊಂಡ ಕುಟುಂಬದ ಸದಸ್ಯರ ಚಿಕಿತ್ಸೆ—ಈ ಕುಟುಂಬದ ಪಾಲಿಗೆ ಭಾನುವಾರದ ಪ್ರಯಾಣ ಮರೆಯಲಾಗದ ಕರಾಳ ನೆನಪಾಗಿ ಉಳಿದಿದೆ.
ನಿಶ್ಚಿತಾರ್ಥದ ಸಂಭ್ರಮದಲ್ಲಿ ಒಂದಾಗಿದ್ದ ಕುಟುಂಬಕ್ಕೆ ಕೆಲವೇ ಕ್ಷಣಗಳಲ್ಲಿ ದುಃಖದ ನೆರಳು ಆವರಿಸಿದ್ದು, ಘಟನೆಯ ಸುದ್ದಿ ತಿಳಿದವರಲ್ಲಿ ತೀವ್ರ ಶೋಕ ವ್ಯಕ್ತವಾಗಿದೆ.
